പ്രതികാര നടപടിയില്ലെന്ന മുഖ്യമന്ത്രിയുടെ വാക്കുകള്‍ക്കു പുല്ലുവില; നേഴ്സുമാ൪ക്കെതിരെ പ്രതികാര നടപടിയുമായ് ഭാരത് ആശുപത്രി മാനേജ്മെന്റ്,

കരാര്‍ അവസാനിച്ചതിനാല്‍ ഇനി ജോലിയില്ലെന്ന് പറഞ്ഞ് ഭാരത് ആശുപത്രിയില്‍ സമരം ചെയ്ത എല്ലാ നഴ്സുമാരെയും പിരിച്ചുവിട്ടു; ഏതു കരാര്‍..? അങ്ങനെയൊരു കരാറും ഇല്ലെന്ന് നഴ്സുമാര്‍; മാനേജ്മെന്റിന്റെ കള്ളക്കളിയെന്ന് യുഎന്‍എ; പ്രതികാര നടപടിക്കെതിരെ ശക്തമായ നിലപാടുമായി യുഎന്‍എ

കോട്ടയം: കോട്ടയം ഭാരത് ആശുപത്രിയില്‍ പിരിച്ചുവിട്ടവരെ തിരിച്ചെടുക്കണം എന്നാവശ്യപ്പെട്ട് സമരം നടത്തിയ നഴ്സുമാരെ മാനേജ്മെന്റ് പിരിച്ചുവിട്ടു. അനി്ശ്ചിതകാല സമരം നടത്തിവന്ന 60 നഴ്സുമാരെയാണ് പിരിച്ചുവിട്ടിരിക്കുന്നത്. സമരം അന്‍പതു ദിവസം പിന്നിടുന്ന ദിവസമാണ് മാനേജ്മെന്റ് കൂട്ടപ്പിരിച്ചുവിടല്‍
കരാര്‍ അവസാനിച്ചു എന്ന കത്ത് നല്‍കിയാണ് ആശുപത്രിയില്‍ വര്‍ഷങ്ങളായി ജോലി ചെയ്തിരുന്ന നഴ്സുമാരെപ്പോലും പിരിച്ചുവിട്ടത്. പിരിച്ചുവിട്ടവരെ തിരികെ എടുക്കണമെന്ന ആവശ്യവുമായി ആശുപത്രിയിലെ നഴ്സുമാരും യുണൈറ്റഡ് നഴ്സസ് അസോസിയേഷനുമാണ് സമരം നടത്തിവന്നത്. സമരം നാല്‍പ്പത് ദിവസം തികഞ്ഞ ദിവസം ഐക്യദാര്‍ഢ്യം പ്രഖ്യാപിച്ചുകൊണ്ട് യുഎന്‍എ പ്രവര്‍ത്തകര്‍ നടത്തിയ പ്രകടനം കോട്ടയം തിരുനക്കര ക്ഷേത്രത്തിന് സമീപം പൊലീസ് തടയുകയും ബലപ്രയോഗം നടത്തുകയും ചെയ്തിരുന്നു.

കരാറടിസ്ഥാനത്തില്‍ നിയമിക്കപ്പെട്ടിട്ടുള്ള നഴ്സുമാരുടെ കരാര്‍ കാലാവധി കഴിഞ്ഞതിനാലാണ് പിരിച്ചു വിട്ടതെന്നാണ് ആശുപത്രി മാനേജ്മെന്റിന്റെ ന്യായം. എന്നാല്‍ മാനേജ്മെന്റിന്റെ നടപടി അന്യായമാണെന്നും അത്തരത്തിലൊരു കരാര്‍ തന്നെ നിലവിലുണ്ടോ എന്ന കാര്യം ഇതേവരെ ബോധ്യപ്പെട്ടിട്ടില്ലെന്നും സമരക്കാര്‍ പറയുന്നു. യുണൈറ്റഡ് നഴ്സസ് അസോസിയേഷന്‍ യൂണിറ്റ് രൂപീകരിക്കുകയും സമരങ്ങളില്‍ പങ്കെടുക്കുകയും ചെയ്തതിന്റെ പ്രതികാര നടപടിയാണ് വ്യക്തമായ കാരണം കാണിക്കാതെയുള്ള പിരിച്ചുവിടലെന്നും സമരത്തിന് നേതൃത്വം നല്‍കുന്നവര്‍ പറയുന്നു.

ഒരു വര്‍ഷം മുതല്‍ അഞ്ച് വര്‍ഷം വരെ സര്‍വീസ് ഉണ്ടായിരുന്ന നഴ്സുമാരെയാണ് മാനേജ്മെന്റ് പിരിച്ചുവിട്ടിരിക്കുന്നത്. അസോസിയേഷന്‍ യൂണിറ്റ് രൂപീകരിക്കാന്‍ നേതൃത്വം നല്‍കിയ പലര്‍ക്കുമെതിരെയാണ് നടപടി. വേതന വര്‍ധനവും മറ്റ് അവകാശങ്ങളും ആവശ്യപ്പെട്ടുകൊണ്ട് സംസ്ഥാനമൊട്ടാകെ അസോസിയേഷന്‍ നടത്തിയ സമരം വിജയമായിരുന്നു. ഒടുവില്‍ സര്‍ക്കാരുമായി നടത്തിയ ചര്‍ച്ചയില്‍ വേതന വര്‍ധനവ് നടപ്പാക്കാമെന്ന് ആശുപത്രി മാനേജ്മെന്റുകള്‍ സമ്മതിക്കുകയും ചെയ്തു. തുടര്‍ന്ന് നടത്തിയ വാര്‍ത്താസമ്മേളനത്തില്‍ സമരം നടത്തിയതിന്റെ പേരില്‍ നഴ്സുമാര്‍ക്കെതിരെ ആശുപത്രി മാനേജ്മെന്റുകള്‍ പ്രതികാര നടപടി സ്വീകരിക്കരുതെന്ന് മുഖ്യമന്ത്രി പിണറായി വിജയന്‍ പറഞ്ഞിരുന്നു. എന്നാല്‍ ആ വാക്കുകള്‍ക്കൊന്നും ഒരു വിലയും ഭാരതിന്റെ മാനേജ്മെന്റ് കല്‍പ്പിച്ചില്ല. ആദ്യം രണ്ട് പേരെ പുറത്താക്കി. പിന്നീട് ഏഴ് പേര്‍ക്കെതിരെയും നടപടി വന്നു. കരാര്‍ കാലാവധി കഴിഞ്ഞു എന്ന് മാത്രമാണ് പിരിച്ചുവിടല്‍ നോട്ടീസിലുള്ളത്.


ജോലിയില്‍ പ്രവേശിക്കുന്ന സമയത്ത് തന്നെ ഒന്നുമെഴുതാത്ത മുദ്രപത്രം ഒപ്പിട്ടുവാങ്ങുന്നുണ്ടെന്നാണ് നഴ്സുമാര്‍ പറയുന്നത്. എല്ലാ വര്‍ഷവും ഇത് ആവര്‍ത്തിക്കും. അതില്‍ എന്താണ് എഴുതുന്നതെന്നോ എന്താണ് കരാറെന്നോ അറിയില്ലെന്നാണ് നഴ്സുമാര്‍ പറയുന്നത്. ഒമ്ബത് നഴ്സുമാരെ പുറത്താക്കിയതായി നോട്ടീസ് നല്‍കിയപ്പോഴാണ് ഇവരെ തിരിച്ചെടുക്കണമെന്ന ആവശ്യവുമായി മാനേജ്മെന്റിനെ സമീപിച്ചത്. തുടര്‍ന്ന് ലേബര്‍ ഓഫിസ് വഴി ശ്രമിച്ചിട്ടും പരിഹാരം ഉണ്ടാകാത്തതിനെത്തുടര്‍ന്നാണ് അനിശ്ചിതകാല സമരം തുടങ്ങിയത്.

Top